म्याग्दीमा एम्बुलेन्स दुर्घटना, चालक बेपत्ता 

म्याग्दीमा  एम्बुलेन्स दुर्घटना हुँदा चालक बेपत्ता भएका छन् । जिल्लाको रघुगंगा गाउँपालिका वडा २, रिठेबोटमा दुर्घटना हुदाँ एम्बुलेन्स चालक मुस्ताङ थासाङ गाउँपालिका–४ का २५ वर्षीय सुजन विक बेपत्ता छन् ।  

मुस्ताङको थासाङ गाउँपालिकाबाट बिरामी लिन आउँदै गरेको ग१झ ३११ नम्बर एम्बुलेन्स आइतबार दिउँसो २ बजे सो स्थानमा दुर्घटनाग्रस्त भएको म्याग्दीका प्रहरी प्रमुख प्रहरी नायब उपरीक्षक किरणजंग कुँवरले जानकारी दिए ।

थासाङ गाउँपालिका निवासी प्रसूति बिरामी बेनी अस्पतालमा डेलिभरी भएकोमा घरतर्फ ल्याउने उद्देश्यले बेनीतर्फ आउँदै गर्दा एम्बुलेन्स दुर्घटना भएको जनाइएको छ ।

दुर्घटनास्थलमा अहिले सुरक्षा निकाय र स्थानीय जनप्रतिनिधि लगायतले खोजीकार्य गरिरहेका छन् ।