मकवानपुरको बकैयामा कुटपिटबाट एक वृद्धको मृत्यु

मकवानपुरको बकैया गाउँपालिकामा कुटपिटबाट एक जनाको मृत्यु भएको छ । बकैया–८ खजुरी दमारका ७९ वर्षीय लालबहादुर स्याङ्तानको कुटपिटबाट मृत्यु भएको जिल्ला प्रहरी कार्यालय मकवानपुरले जनाएको छ । 

स्याङ्तानमाथि सोही ठाउँका ३० वर्षीय गोपाल घिसिङले फागुनको १४ गते कुटपिट गरेको आरोप लागेको छ । छिमेकीको विवाहमा गएका दुवैजनाको सामान्य भनाभनबाट सुरु भएको विवाद कुटपिटसम्म पुगेको थियो ।

कुटपिटबाट गम्भीर घाइते भएपछि उपचारको लागि भरतपुर अस्पताल लगिएको  स्याङ्तानलाई उपचार पश्चात बिहीवार मात्र घर फार्काइएको थियो । घर आएको भोलीपल्ट (हिजो शुक्रबार) दिउँसो स्याङ्तानको मृत्यु भएको परिवारले प्रहरीलाई जानकारी गराएको प्रहरीले जनाएको छ । 

घिसिङको कुटपिटबाट वृद्धको ज्यान भएको भन्दै प्रहरीमा २२ फागुन बिहीवार उजुरी परेपछि उनलाई पक्राउ गरिएको जिल्ला प्रहरी कार्यालय मकवानपुरले जनाएको छ ।

कुटपिटबाट घाइते भएको १० दिनपछि मृत्यु भएकोले पोष्टमार्टमबाटै स्याङ्तानको मृत्युको कारण खुल्ने    मकवानपुर प्रहरी प्रवक्ता प्रहरी नायव उपरीक्षक टिकाबहादुर कार्कीले जनाएको छ ।