विपन्न चेपाङ परिवारलाई कम्बल गरियो, स्कूले विद्यार्थीको दन्त परीक्षण

‘एक्सपर्ट पब्लिक स्पिकिङ च्याम्प–२’ प्रतियोगिताको फाइनलमा पुगेका १० जना प्रतियोगीहरुले चितवनको इच्छाकामना गाउँपालिका–२ तल्लो काउलेमा पुगेर विपन्न चेपाङ परिवारलाई कम्बल वितरण गरेका छन् । हिजो सो गाउँपालिकाको श्री जनप्रिय मावि कल्याणटार, काउलेमा चेपाङ परिवारलाई कम्बल वितरण गरिएको थियो । एक्सपर्ट एजुकेशन एण्ड भिसा सर्भिसेसले कम्बल उपलब्ध गराएपछि १० जना विद्यार्थीहरु कम्बल वितरण गर्न पुगेका थिए । वास्तविक नेपाली समाजको चित्र तथा भौगोलिक अवस्था अनुभवका लागि प्रतियोगीहरुलाई सो कार्य गराईएको प्रतियोगिता आयोजक संस्था विमोचन इभेन्ट एण्ड इन्टरटेन्मेण्टले जनाएको छ । 
सो कार्यक्रममा प्रतियोगिताको मुख्य प्रायोजक एक्सपर्ट एजुकेशन एण्ड भिसा सर्भिसेस चितवनका प्रवन्ध निर्देशक डिल्लीराम अधिकारीले प्रतियोगिहरुलाई किताबी ज्ञान मात्र नभइ बाहिरी व्यवहारिक ज्ञानका लागि यस्ता कार्यक्रम गरिएको बताएका छन्  । 
कम्बल लिनका लागि पहाडी भेगका नाइबेन्दी, भोटेगाउँ, माझगाउँ, तोरडाँडा, छाँपडाँडालगायतका स्थानबाट करीब ५० घरपरिवारका चेपाङ महिला र पुरुषहरु कम्बल लिन आइपुगेका थिए । चिसो बढेसंगै चितवनका पहाडी भेगमा बसोबास गर्ने विपन्न चेपाङ समुदाय समस्या पर्न थालेको छ । न्यानो कपडा नहुँदा दाउराले आगो बालेर रात काट्नु पर्ने अवस्था रहेको छ । 
सोही अवसरमा सो विद्यालयमा अध्ययनरत विद्यार्थीहरुको निःशुल्क दन्त परीक्षण गरिएको छ । चितवन डेण्टल होमको प्राविधिक सहयोगमा डा.रिस्नु केसी, डा.सन्ध्या कँडेलको टोलीले परीक्षण गरेको थियो । कार्यक्रममा विद्यालयमा अध्ययनरत विद्यार्थीहरुका लागि प्रतियोगीहरुले खेलकुदका सामग्री समेत प्रदान गरेको थियो । प्रतियोगीहरुले विद्यालयका प्राचार्य अधिकारी, शिक्षक लोकबहादुर मगरलाई सामग्री हस्तान्तरण गरेका थिए । ‘एक्सपर्ट पब्लिक स्पिकिङ च्याम्प–२’ प्रतियोगिताको फाइनल फाइनल यही मंसिर २० गते भरतपुरमा हुँदैछ ।