मकवानपुर प्रहरीद्वारा ३ बिगाहा गाँजाखेती नष्ट

जिल्ला प्रहरी कार्यालय मकवानपुरले लागूऔषध गाँजाखेती नष्ट गर्ने क्रममा आज राक्सिराङ गाउँपालिका वडा नम्बर २ का विभिन्न स्थानमा लगाईएका गाँजा खेती उखेलेर नष्ट गरेको छ । जिल्ला प्रहरी प्रमुख एसपी मुकेशकुमार सिंहसहितको टोलीले राक्सिराङ गाउँपालिका वडा नम्बर–२ का कालीधाप, चनौटा र निगरान क्षेत्रका करीब ३ बिगाहा २ कठ्ठा जग्गामा लगाईएको गाँजाका बोटहरु उखेलेर नष्ट गरेको हो । 
गाँजा खेती नष्ट गर्ने क्रममा प्रचलित कानुनी कार्वाही र लागूऔषधले समाजमा पार्ने नकारात्मक असर बारे जनचेतनामुलक पर्चा–पम्प्लेट सो क्षेत्रमा वितरण गरिएको थियो ।
जिल्ला प्रहरी कार्यालयका अनुसार सो क्षेत्रमा बाँकी रहेका गाँजा खेती नष्ट गर्न थप प्रहरी परिचालन गरेको छ । प्रहरी कार्यालयका अनुसार ७५ जनाको प्रहरी टोली आजै दिउँसो लागूऔषध गाँजा लगाईएको क्षेत्रमा पुगीसकेको मकवानपुर प्रहरी प्रवक्ता यज्ञप्रसाद भट्टराईले जनाएका छन् । सो क्षेत्रका सबै गाँजा खेती नष्ट गर्न प्रहरी टोली ५ दिन सोही क्षेत्रमा रहने बताईएको छ ।