मनहरी दुर्घटनाका घाइते थप एकको मृत्यु
हेटौडा न्युज
मकवानपुर/मकवानपुरको मनहरीमा शनिबार दिउँसो भएको दुर्घटनाका घाइते थप एक जनाको मृत्यु भएको छ ।
पूर्व-पश्चिम राजमार्ग अन्तर्गत मनहरीमा स्कारपियो र कार एक आपसमा ठोक्किँदा गम्भीर घाइते चितवन राप्ती नगरपालिका २, गड्यौली बस्ने ५० वर्षीया सुनिता श्रेष्ठको साँझ मृत्यु भएको प्रहरीले जनाएको छ । कार चालक हेटौँडा उपमहानगरपालिका ४, स्कुलरोड बस्ने सुरेन्द्रलाल श्रेष्ठको उपचारका क्रममा दिउँसो निधन भएको थियो ।
मकवानपुरको मनहरी ६ मा वीरगन्जबाट चितवनतर्फ जाँदै गरेको बागमती प्रदेश ०१-०२६ च ५२५० नम्बरको स्कारपियो र चितवनबाट हेटौँडातर्फ आउँदै गरेको बा १६ च ८३२४ नम्बरको कार ठोक्किएको थियो । घटनामा घाइते अन्य १२ जनाको चितवनमा उपचार भइरहेको छ ।
प्रहरीका अनुसार दुर्घटनामा संलग्न स्कारपियो चालक रौतहटका अन्दाजी २० वर्षीय किशन जैसवाल फरार रहेका छन् । उनको खोजी कार्य भइरहेको जिल्ला प्रहरी कार्यालय मकवानपुरले जनाएको छ ।
