थाहा फोटो प्रर्दशनी हेटौंडामा आजबाट शुरु

हेटौँडा । हेटौंडामा आजबाट दुईदिने “थाहा फोटो प्रर्दशनी” शुरु भएको छ । मकवानपुरको उत्तरी क्षेत्रको पर्यटकीय क्षेत्रको रुपमा रहेको थाहा नगरपालिकाका ऐतिहासिक, धार्मिक पर्यटकीय क्षेत्रको प्रचार तथा प्रवद्र्धन गर्ने उद्देश्यले फोटो प्रदर्शनी गरिएको हो । प्रर्दशनीमा ६० वटा फोटोहरु प्रर्दशनमा राखिएको छ ।

थाहा नगरपालिकाको आयोजना तथा फरक सोच अभियान, शिखर क्लबको संयोजनमा ६० वटा फोटोहरु प्रर्दशनीमा राखिएको छ ।

फोटो प्रर्दशनीको हेटौँडा उपमहानगरपालिकाकी मेयर मिनाकुमारी लामाले उद्घाटन गरेकी थिईन् । उदघाटन कार्यक्रमलाई सम्बोधन गर्दै मेयर लामाले प्रर्दशनीले नेपाली पर्यटन क्षेत्रलाई प्रचारप्रसार गर्न सहयोग गर्ने धारणा व्यक्त गरेकी थिईन् ।

उद्घाटन कार्यक्रममा थाहा नगरपालिका वडा नम्बर–३ का वडाध्यक्ष हृदयन्द्र रायमाझी, नेपाल पत्रकार महासंघ बागमती प्रदेशका पूर्व अध्यक्ष प्रताप विष्ट, महासचिव कृष्ण सारुमगर, मकवानपुर शाखा अध्यक्ष मणीराज गौतम, राष्ट्रिय फोटो पत्रकार समूह मकवानपुरका अध्यक्ष धर्मेन्द्र दाहाल लगायको उपस्थिति रहेको थियो । बागमती प्रदेश सरकारले पनि केही दिन अघि “पर्यटन बर्ष–२०२४” घोषणा गरेको थियो ।