अवैध काठसहित दुईजना पक्राउ

मकवानपुर । प्रहरीले अवैध काठ र गाडी सहित दुई जनालाई पक्राउ गरेको छ ।

हेटौंडा उपमहानगरपालिका वडा नम्वर ३ स्थित सडकखण्डबाट ८८ दशमलव ६० क्युफिट सालको काठसहित दुई जनालाई पक्राउ गरेको जिल्ला प्रहरी कार्यालय मकवानपुरले जनाएको छ । पक्राउ पर्नेहरुमा हेटौंडा उपमहानगरपालिका वडा नम्वर १२ बस्ने २४ वर्षीय सुशान लोप्चन र १८ वर्षीय सुदिप लोप्चन रहेको जिल्ला प्रहरी कार्यालय मकवानपुरका प्रहरी निरीक्षक देवेन्द्र दासले जानकारी दिए ।

हाडीखोला तर्फबाट बस्तीपुर चोकतर्फ आउँदै गरेको बागमती प्रदेश ०३–००१– च १२६०नं. को पिकअप गाडीलाई रोकी चेकजाँच गर्दा लुकाईछिपाई ल्याएको उक्त परिणामको काठ बरामद भएपछि निज गाडी चालक सुशान र गाडीमा सवार सुदिपलाई पक्राउ गरेको प्रहरी निरीक्षक दासले बताए । उनीहरुलाई काठ र गाडीसहित नियन्त्रणमा लिई आवश्याक कारवाहीको भईरहेको मकवानपुर प्रहरीले जनाएको छ ।