सरकारी डाक्टरलाई निजी क्लिनिकमा काम गर्न निषेध, हेटौंडा अस्पतालले तत्काल लागू गर्ने

मकवानपुर। नेपाल सरकारको मन्त्री स्तरीय निर्णयले सरकारी अस्पताल वा प्रतिष्ठानमा कार्यररत चिकित्सकले निजी क्लिनिकमा काम गर्नै नपाउने निर्णय गरेको छ । स्वास्थ्य तथा जनसंख्या मन्त्रालयका अनुसार सरकारी चिकित्सकहरूले प्राइभेट प्राक्टिस वा निजी क्लिनिकमा काम गर्न नपाउने जनाएको छ ।

पछिल्लो समय सरकारी अस्पतालमा कार्यरत चिकित्सकहरूले आफू कार्यरत दरबन्दी भएको सरकारी अस्पतालमा भन्दा निजी क्लिनिक तथा निजी अस्पतालमा बढी समय दिन थालेको गुनासो आएपछि गत साउन ९ गते यस्तो निर्णय लिएको छ ।

मन्त्रालयका अनुसार सरकारी चिकित्सकहरूले कुनै पनि निजी क्लिनिक वा अस्पतालमा आफू कार्यरत सरकारी अस्पतालको नाम लेख्‍न कतै उल्लेख गर्न समेत नपाउने भएका छन् । सरकारको यस्तो निर्णय कार्यान्वयन गर्न सबै सरकारी अस्पताल तथा प्रतिष्ठानहरूलाई पठाईएको जनाएको छ ।

हेटौंडा अस्पतालमा तत्काल लागू गरिने

यस सम्बन्धमा हेटौंडा अस्पताल विकास समितिका अध्यक्षले सो निर्णय तत्काल लागू हुने बताएका छन् । आफूले यो निर्णय बारे सुनेको भएपनि पत्र आईनपुगेको र पत्र प्राप्त भएकै दिनदेखि कार्यान्वयनमा लगिने बताएका छन् ।

हेटौंडा अस्पतालमा कार्यररत अधिकांश चिकित्सकहरु निजी क्लिनिकमा पनि कार्यररत रहेका छन् । निर्णय कार्यान्वयन भएमा हेटौंडा अस्पतालमा कार्यररत चिकित्सकहरु कुनै पनि निजी क्लिनिकमा प्राईभेट प्राक्टिस वा काम गर्न दुबै पाउने छैनन् ।