अफिमसहित राक्सिराङका थिङ पक्राऊ

तस्वीर-जिप्रका, मकवानपुर ।

मकवानपुर । प्रहरीले हेटौंडा उपमहानगरपालिका वडा नम्बर ११, थानाभर्याङबाट लागूऔषध अफिमसहित १ जनालाई पक्राऊ गरेको छ । प्रहरीको लागूऔषध नियन्त्रण ब्युरो कोटेश्वर काठमाण्डौबाट खटिएको प्रहरी टोलीले मकवानपुर राक्सिराङ गाउपालिका वडा नम्बर ३ का ३५ बर्षीय पदमबहादुर थिङलाई पक्राउ गरेको जनाएको छ ।

पक्राऊ परेका थिङले बोकेको झोला चेकजाँच गर्ने क्रममा लागूऔषध अफिम १ किलो ९ सय ५० ग्राम फेला परेको जिल्ला प्रहरी कार्यालय, मकवानपुरले जनाएको छ । उनलाई हिजो आईतबार दिउँसो करीब २ बजे पक्राऊ गरिएको प्रहरीले जनाएको छ ।

लागूऔषध नियन्त्रण ब्युरोको टोलीले आवश्यक अनुसन्धान तथा कानूनी कार्वाहीका लागि जिल्ला प्रहरी कार्यालय, मकवानपुरलाई बुझाएको मकवानपुर प्रहरी प्रवक्ता प्रहरी नायब उपरीक्षक इन्द्रबहादुर रानाले जनाएका छन् ।