कवि निखिललाई विद्यावारिधि

मकवानपुर/मकवानपुरे कवि एवम् समालोचक निमेष निखिल (खिलप्रसाद बराल) ले विद्यावारिधि (पीएचडी) उपाधि हासिल गरेका छन् । उनले नेपाल संस्कृत विश्वविद्यालयबाट ‘गणतन्त्रपछिका नेपाली गद्य कवितामा वक्रोक्ति’ विषयमा विद्यावारिधि पूरा गरेका हुन् ।

मकवानपुरको मकवानपुर बहुमुखी क्याम्पसको नेपाली तथा पत्रकारिता विभागका प्रमुख समेत रहेका निखिल तीन दशकदेखि साहित्य लेखन तथा अध्यापनमा सक्रिय छन् । उनका ‘मनहरूको परिसर’, ‘उमेरको नदी’ र ‘शोकगीतको पोस्टमार्टम’ तीनवटा कविता सङ्ग्रह प्रकाशित छन् । साहित्य लेखनका लागि विभिन्न पुरस्कार तथा सम्मानबाट सम्मानित भइसकेका निखिलले २०७२ मा युवावर्ष मोती पुरस्कार समेत प्राप्त गरिसकेका छन् ।

साहित्य सङ्गम मकवानपुरको पूर्व अध्यक्ष निखिल सर्जक सञ्जाल मकवानपुरका संयोजक रहेका छन् ।