मकवानपुर उद्योग वाणिज्य संघको अध्यक्षमा रानाभाट विजयी

मकवनापुर/मकवानपुर उद्योग वाणिज्य संघको अध्यक्षमा प्रमोद सिंह रानाभाट निर्वाचित भएका छन् । आइतबार बिहान सम्पन्न मतपरिणामअनुसार अध्यक्ष पदमा अनिल अग्रवाललाई हराउँदै रानाभाट विजयी भएका हुन् । रानाभाटले एक हजार १४ मत प्राप्त गर्दा अग्रावालले सात सय ६५ मत ल्याएका छन् ।

संघको महासचिव पदमा प्रतिमा श्रेष्ठ एक हाजर १२ मतसहित विजयी हुँदा विकेशलाल श्रेष्ठले सात सय १३ मत पाएका छन् । यस्तै कोषाध्यक्षमा तेजराज अधिकारी नौ सय १७ मत पाएर विजयी भएका छन् । उपाध्यक्षहरूमा वाणिज्यतर्फ राजु अधिकारी, उद्योगतर्फ दीपक उप्रेती, एसोसिएटतर्फ उज्ज्वल चौलागाईँ र वस्तुगततर्फ काव्यमणि अधिकारी निर्वाचित भएका छन् ।

वाणिज्यतर्फको सचिवमा कुलप्रसाद चौलागाईँ विजयी भए भने सदस्यहरूमा बालकृष्ण बजगाईँ, सन्तोष घिमिरे, विष्णुप्रसाद दाहाल र राजेन्द्र लामिछाने निर्वाचित भए । उद्योगतर्फ सदस्यमा भुपेन्द्रप्रसाद अधिकारी, कृष्णगोपाल महर्जन र जगदीश दाहाल विजयी हुँदा महिला सदस्यमा सीतादेवी भेटवाल निर्वाचित भइन् ।

यसैगरी एसोसिएट सदस्यमा नवराज खतिवडा र अंकिता सुमार्गी विजयी भए । वस्तुगततर्फ सचिवमा नेत्रप्रसाद अधिकारी र राजाराम कार्की दुबैको समान १३-१३ मत भएको छ । सदस्यमा भने शम्भु पुडासैनी विजयी भएका छन् ।

पुस २४ गतेदेखि सुरु भएको संघको ५८ औँ साधारणसभा तथा अधिवेशनबाट नयाँ नेतृत्व चयनका लागि शनिबार भएको मतदानमा कूल दुई हजार ४६ मध्ये एक हजार आठ सय १६ जनाले मतदान गरेका थिए ।