मनहरीमा बाघको आक्रमणबाट एक जनाको मृत्यु

फाईल तस्वीर

मकवानपुर । मकवानपुरको मनहरीमा बाघको आक्रमणबाट एक जनाको मृत्यु भएको छ । हिजो आइतबार मनहरी गाउँपालिका वडा नम्बर–५ बसन्तपुर वडा कार्यालय नजिकै बस्ने ७२ वर्षीया कान्छिमाया रुम्बालाई बाघले आक्रमण गरेको थियो । घर नजिकै बारीमा घाँस काट्न गएकोमा अबेरसम्म घर नआएपछि आफन्तले खोजी गर्दै जाने क्रममा आफ्नै घरबाट करिब ५०० मिटर पूर्वमा उनको शव फेला परेको थियो । शरीरको विभिन्न भागमा चोट लागेको अवस्थामा फेला परेकी उनलाई बाघले आक्रमण गरी मृत्यु भएको जिल्ला प्रहरी कार्यालय मकवानपुरले जनाएको छ ।

आज बिहानै पनि घटनास्थल नजिक स्थानीय सूर्यबहादुर मोक्तानको ६ वटा बाख्रा बाघले मारेको अहिले घटनास्थलमै रहेका पत्रकार दिलकुमार लामाले जानकारी दिएका छन् ।