बाहिरियो चितवन राइनोज; कर्णाली याक्सले क्वालिफायर खेल्ने
हेटौडा न्युज
मकवानपुर/सिद्धार्थ बैंक नेपाल प्रिमियर लिगबाट चितवन राइनोज बाहिरिएको छ । बुधबार भएको इलिमिनेटरमा कर्णाली याक्ससँग २१ रनले पराजित हुँदै राइनोज उपाधी होडबाट बाहिरिएको हो । यो जीतसँगै याक्सले सुदूरपश्चिम रोयल्स र जनकपुर बोल्ट्सको खेलमा पराजित हुने टोलीसँग दोस्रो क्वालिफायर खेल्ने भएको छ ।
बुधबार भएको खेलमा टस जितेको चितवन राइनोजले कर्णाली याक्सलाई पहिले ब्याटिङको निम्तो दिएको थियो । याक्सका ओपनर रित गौतम पहिलो बलमै आउट भए पनि अर्का ओपनर जयकिसन किल्सावालाले ३९ बलमा ५३ रन जोडेर जीतको आधार तयार गरेका थिए । यस्तै विलियम बोसिस्टोले ५२ रन जोड्दा चाड्विक वाल्टनले ४६ रनको पारी खेलेका थिए । राइनोजका सोहेल तनवीरले २ विकेट लिँदा शरद भेषावकर, रवि बोपारा र कुशल मल्लले १-१ विकेट लिए ।
१७६ रनको लक्ष्य पछ्याउँदै मैदानमा उत्रिएको राइनोजका लागि ब्याटिङतर्फ रवि बोपाराले मात्र सम्झनलायक प्रदर्शन गरे । उनले ३४ बलमा ५३ रन जोडे पनि अन्य खेलाडी क्रिजमा टिक्न नसक्दा पुरै २० ओभर खेल्दै राइनोज ९ विकेटको क्षतिमा १५४ रनमा समेटियो । याक्सका लागि जीसन मक्सुदले उत्कृष्ट बलिङ गर्दै २६ रन खर्चेर ३ विकेट लिए । कप्तान सोमपाल कामी र नन्दन यादवले २-२ विकेट लिए भने विपिन शर्माले १ विकेट आफ्नो नाममा लेखाए ।
