ज्ञानोदयमा तेस्रो एकल गायन प्रतियोगिता हुने

मकवानपुर/हेटौंडा-५, पिप्लेमा रहेको ज्ञानोदय बालवाटिका आवासीय माविले तेस्रो अन्तर विद्यालय खुला एकल गायन प्रतियोगिता गर्ने भएको छ । वरिष्ठ कलासाधक भीम विरागको स्मृतिमा आगामी फागुन १५ गते प्रतियोगिता आयोजना गरिने विद्यालयका संस्थापक प्रिन्सिपल श्यामकुमार बानियाँले जानकारी दिए ।

विद्यार्थीहरूमा अनर्निहीत प्रतिभा प्रस्फुटन गर्ने उद्देश्यले विगतका वर्षझैँ यसपटक पनि कार्यक्रम आयोजना गर्न लागिएको बानियाँले बताए । कार्यक्रममा १० कक्षासम्मका बालबालिकाहरूले सहभागिता जनाउन सक्ने प्रतियोगिता संयोजक आल्देन लिङ्देनले जानकारी दिए । प्रतियोगिताका लागि सहभागीले गाउने गीत भने नेपालीपन झल्कने सन्देशमूलक हुनुपर्ने लिङ्देनले उल्लेख गरे ।

प्रतियोगितामा सहभागी हुन चाहने विद्यालयलाई १ हजार ५ सय शुल्क तिरी फागुन १० गतेभित्र नाम दर्ता गर्न विद्यालयले आव्हान गरेको छ । प्रतियोगितामा प्रथम, द्वितीय र तृतीय हुने सहभागीले क्रमशः रु १० हजार, ७ हजार र ५ हजार नगदका साथै ट्रफी र प्रमाणपत्र प्राप्त गर्ने आयोजकले जनाएको छ ।