आधुनिकमा छात्रवृत्ति कोष सुरु

मकवानपुर/हेटौंडाको आधुनिक राष्ट्रिय माध्यमिक विद्यालयमा छात्रवृत्ति कोष सुरु भएको छ । मकवानपुर जिल्लाका शैक्षिक व्यक्तित्व तथा सो विद्यालयका पूर्व सहायक प्रधानाध्यापक श्यामप्रसाद पराजुलीको स्मृतिमा छात्रवृत्ति कोष स्थापना गरिएको हो । पराजुलीले करिब २ दशक सो विद्यालयमा अध्यापन गरेका थिए । पराजुलीका छोरीहरू कल्पना पराजुली र सम्झना पराजुलीले सोमबार १ लाख २६ हजार बराबरको चेक विद्यालयलाई हस्तान्तरण गरेका छन् ।

कोषका लागि प्राप्त चेक ग्रहण गर्दै विद्यालयका प्रधानाध्यापक रामसागर गुरागाईंले यसलाई महत्वपूर्ण सहयोगका रुपमा लिँदै छात्रवृत्ति कोषमा सहयोग गर्न चाहने महानुभावहरुलाई आह्वान समेत गरेका छन् । चेक हस्तान्तरण कार्यक्रममा हेटौंडा ४ नम्बर वडा अध्यक्ष नवीन सिग्देल, विद्यालय व्यवस्थापन समिति अध्यक्ष मोहम्मद समिम, विद्यालयका पूर्वशिक्षक रोशन पराजुली लगायतको उपस्थिति थियो ।

सो अवसरमा बोल्दै वडा अध्यक्ष सिग्देलले छात्रवृत्तिका लागि कार्यविधि बनाइने बताएका छन् ।