गीतकार बानियाँको छैठौँ म्युजिक भिडियो सार्वजनिक

मकवानपुर/ गीतकार श्यामकुमार बानियाँद्वारा रचित स्वदेश गान ‘यो देशले तिम्रो काँध मागेको छ…’ को म्युजिक भिडियो सार्वजनिक भएको छ । आइतबार सर्वश्री मिडियाको युट्युब च्यानलमार्फत म्युजिक भिडियो सार्वजनिक गरिएको हो । गीतमा नवराज पराजुलीको स्वर र ओम प्रकाश राईको संगीत रहेको छ । यस्तै रामकृष्ण थापाले संगीत संयोजन गरेका छन् ।

म्युजिक भिडियोको छायांकन तथा सम्पादन महेन्द्र ओझाले गरेका हुन् । लामो समयदेखि मकवानपुरमा रहेर साहित्य रचना गर्दै आएका बानियाँले यसअघि दुईवटा स्वदेश गानसहित पाँचवटा गीतका म्युजिक भिडियो ल्याइसकेका छन् । उनका ‘आकाश खुल्यो सुस्तरी’ र ‘हिमालमा घाम झुल्क्यो…’ बोलका स्वदेश गान २०८० फागुनमा सार्वजनिक भएका थिए । गायनमा समेत रुची राख्ने बानियाँले ‘आकाश खुल्यो सुस्तरी…’ आफ्नै स्वरमा रेकर्ड गराएका थिए । यस्तै उनको आवाजमा ‘शून्य शून्य…’ र ‘माया भन्नु…’ बोलको गीतका म्युजिक भिडियो यसै वर्ष असोजमा सार्वजनिक भएका थिए ।