भैंसीको प्रतिकारमा बाघ मारियो, भैंसी घाईते
हेटौडा न्युज
मकवानपुर । जिल्लाको मनहरी प्रतापपुरमा भैँसीको आक्रमणबाट बाघ मरेको छ । जिल्ला प्रहरी कार्यालय मकवानपुरका अनुसार स्थानीय बलबहादुर राईको भैंसीगोठमा पसेर त्यहाँ रहेकोे भैँसीलाई आक्रमण गर्न खोज्दा भैंसीकै आक्रणबाट बाघको मृत्यु भएको मकवानपुर प्रहरीले जनाएको छ ।
मकवानपुर प्रहरीका अनुसार मनहरी गाउँपालिका– ६ प्रतापपुरमा बाघले आक्रमण गर्दा एउटा भैंसी पनि घाइते भएको र भैंसीले आक्रमण गर्न आएको बाघलाई प्रतिकार गर्दा बाघ कै मृत्यु भएको मकवानपुर प्रहरी प्रवक्ता लक्ष्मी भण्डारीले जानकारी दिएका छन् । स्थानीयले घटनाको जानकारी गराएपछि इलाका प्रहरी कार्यालय मनहरीबाट प्रहरी टोली र पर्सा वन्यजन्तु आरक्षण सुरक्षार्थ खटिएको मध्यवर्ती क्षेत्र पदमपोखरी सेक्टर लामीटार ब्यारेकबाट नेपाली सेनाको टोली घटनास्थलमा पुग्दा बाघ मृत फेला परेको थियो ।
घटनास्थलमा खटिएको प्रहरी टोलीका अनुसार बाघ बुढो घाईते अवस्थामा रहेको र भैंसीले हान्दा बाघको मृत्यु भएको हुन सक्ने बताए । मरेको बाघलाई चितवन राष्ट्रिय निकुन्ज सौराहा ब्यारेकबाट खटिएको नेपाली सेनाको टोलीले आवश्यक व्यवस्थापनका लागि लगेको छ ।
