व्यवसायी र प्रहरी बिच विवाद, अटेरी उद्योग वाणिज्य संघ

मकवानपुर । हेटौंडाका व्यवसायी र प्रहरी बिच पसल खोल्ने विषयमा विवाद भएको छ । बागमती प्रदेशको राजधानी हेटौँडामा आज बिहान पसल व्यवसाय खोल्ने कि बन्द गर्ने भन्ने विषयमा प्रहरी र उद्योगी व्यवसायीहरुबीच भएको विवाद भएको हो ।

बुधबार बिहानै व्यवसाय खुलाउँदै हिँडेका उद्योग वाणिज्य संघका अध्यक्ष कृष्ण कटुवालसहितको टोलीलाई प्रहरीले लकडाउनको पूर्ण पालना गराउनु भन्ने आदेश भएको भन्दै प्रहरीले व्यवसाय संचालनमा रोकेपछि विवाद झनै चर्कीएको थियो । अध्यक्ष कटुवालसहितको उद्योगी व्यवसायीका नेताहरु पसल व्यवसाय खुलाउँदै थिए भने प्रहरी लकडाउनको पालना गराउन पसल व्यवसाय बन्द गराउँदै थिए।

करिब एक घण्टाको विवाद भए पछि अन्तत प्रहरीले आज एकदिनका लागि विहान ९ बजेसम्म पसल व्यवसाय संचालन गर्न दिएको छ । भोलिबाट के गर्ने भन्ने विषयमा सबै सरोकारवाला निकायहरुबीच छलफल गरेर अघि बढ्ने बताइएको छ ।

कोरोना भाइरसको संकटका बेला सरकारले देशभर लकडाउन गरेको आज ७२ दिन पुगेको छ । सरकारले गरेको लकडाउनका कारण उद्योगी व्यवसायी मारमा परेको भन्दै मकवानपुर उद्योग वाणिज्य संघले सुरक्षाका विधि अपनाएर व्यवसाय संचालन गर्न पाउनुपर्ने माग राख्दै आएका छन् ।

त्यसो त जिल्लामा कोरोना भाइरस रोकथाम तथा नियन्त्रणका लागि कमाण्ड पोष्ट गठन भएको छ । दैनिक रुपमा कमाण्ड पोष्टको बैठक समेत बस्ने गरेको छ । मकवानपुर उद्योग वाणिज्य संघ समेत सो कमाण्ड पोष्टको सदस्य रहेको छ । कमाण्ड पोष्टको हरेक बैठकमा उद्योग वाणिज्य संघका अध्यक्ष वा उद्योगी व्यवसायीका नेताहरु प्रतिनिधिका रुपमा जाने गरेका छन् ।

यसरी बैठकमा सहभागि पनि हुने, कमाण्ड पोष्टको निर्णय मान्छु र कार्यन्वयन गराउछु भन्दै हिड्ने व्यवसायीका अगुवाले नै आफ्ले गरेका निर्णको व्यवास्ता गर्दै पसल व्यवसाय खुलाउँदै हिड्दा नेतृत्व माथि नै प्रश्न चिन्ह खडा भएको छ ।